គីម ជុងអ៊ុន ព្រមានថា បើគ្រាប់កាំភ្លើងអាមេរិក១គ្រាប់ហោះចូលកូរ៉េខាងជើង ទឹកដីអាមេរិកទាំងមូលនឹងក្លាយជាគំនរផេះភ្លាម
លោក គីមជុងអ៊ុន បានគំរាមថានឹងវាយអាមេរិកឱ្យក្លាយជាផេះជាមួយអាវុធនុយក្លេអ៊ែរប្រសិនបើអាមេរិកហ៊ានបាញ់តែមួយគ្រាប់ចូលដីកូរ៉េខាងជើង។ នេះបើតាមប្រភព Daily Mail ចេញផ្សាយថ្ងៃចន្ទនេះ។
រដ្ឋាភិបាលក្រុងព្យុងយ៉ាងបាននិយាយថា ខ្លួននឹងប្រើរ៉ុក្កែត “Hwasong” របស់ខ្លួនដោយភ្ជាប់ជាមួយក្បាលគ្រាប់នុយក្លេអ៊ែរដើម្បីការពារអធិបតេយ្យរបស់ខ្លួន ស្របពេលភាពតានតឹងជាមួយប្រទេសកូរ៉េខាងត្បូងបានកើនឡើង។
ការគំរាមនេះបានកើតឡើងខណៈរដ្ឋាភិបាលក្រុងសេអ៊ូលបានទទូចថា ការធ្វើតេស្តជើងទម្ររ៉ុក្កែតរបស់កូរ៉េខាងជើងនាពេលថ្មីៗនេះបានបង្ហាញភាពជឿនលឿន “ដ៏មានអត្ថន័យ” ហើយអ្នកវិភាគម្នាក់បាននិយាយថា រដ្ឋឯកោមួយនេះបានដើរឆ្ពោះទៅគោលដៅដ៏គ្រោះថ្នាក់នៃការអភិវឌ្ឍរ៉ុក្កែតដែលអាចវាយប្រហារសហរដ្ឋអាមេរិក។
សេចក្ដីថ្លែងការណ៍ចេញពីការិយាល័យការបរទេសរបស់គីមជុងអ៊ុន ត្រូវបានបញ្ចេញកាលពីដើមខែនេះ មុននឹងការធ្វើតេស្តមីស៊ីលនាពេលថ្មីៗនេះ។
សេចក្ដីថ្លែងការណ៍នោះមានខ្លឹមសារយ៉ាងដូច្នេះថា “កងទ័ពប្រជាជនកូរ៉េនឹងធ្វើឱ្យមូលដ្ឋានឈ្លានពាននិងបង្ករឿង ឱ្យទៅជាផេះជាមួយរ៉ុក្កែត Hwasong ដែលបានបំពាក់ជាមួយក្បាលនុយក្លេអ៊ែរ និងការពារសន្តិសុខប្រទេសដ៏គួរឱ្យជឿជាក់និងសេចក្ដីសុខរបស់ប្រជាជនក្នុងករណីសហរដ្ឋអាមេរិក និងទ័ពអាយ៉ងកូរ៉េខាងត្បូងហ៊ានបាញ់តែមួយគ្រាប់មកលើដែនដីសាធារណរដ្ឋប្រជាមានិតប្រជាធិបតេយ្យកូរ៉េ”៕
ប្រភព៖ khmerread
Post a Comment